Monday, May 19 2008
મુક્તકો 8:16 am
દિલ તમોને આપતાં આપી દીધું,
ને ફરીથી પામતાં માપી લીધું.
માત્ર એક જ ક્ષણ તમે રાખ્યું છતા,
ચો તરફથી કેટલું કાપી લીધું.
-મનહર મોદી
Wednesday, May 14 2008
ગઝલ and મારી રચનાઓ 7:49 am
ગજુ જોઇને લેનારનુ, કિંમત મારી મે વધારી હતી,
“દીપ”ને હવે કોઈ, મફતમા પણ લેવા તૈયાર નથી.
- દીપક પરમાર (”દીપ”)
એ પ્રેમ છે: અજ્ઞાત Tuesday, Jun 26 2007
ગઝલ 12:24 pm
શ્વાસમાં વિશ્વાસ જ્યાં ભેળો મળે એ પ્રેમ છે,
આશનો અવકાશ જ્યાં પણ શૂન્ય છે એ પ્રેમ છે.
હક, અપેક્ષા, શક, અહમ્ ના પંક ની વચ્ચેથી કોઈ,
પદ્મ સમ નિર્મળ અગર ખીલી શકે એ પ્રેમ છે.
બેકરારી વસ્લ માં, પીડા વિરહ માં કત્લની,
એટલું સમજી શકો કે કેમ છે એ પ્રેમ છે.
‘તું નથી’ ની વાસ્તવિક્તા કષ્ટ દેતી બંધ થઈ,
શ્વાસમાં, ઉચ્છવાસ માં બસ, તું વહે એ પ્રેમ છે.
બાદબાકી તુજ ની, તારાં સ્પર્શ, યાદો, સાથની,
શેષ મારામાં પછી જે પણ બચે એ પ્રેમ છે.
શબ્દ થઈ મુજ શ્વાસ માં બસ તું સદા વહેતી રહે,
આ ગઝલ શબ્દો નથી કંઈ, આ જે છે એ પ્રેમ છે.
રાત આખી બેકરારી થઈ મને ડંસતી રહે,
ને સવારે શબ્દ થઈ ચૂમે મને એ પ્રેમ છે.
-અજ્ઞાત
હમેશાં હસતો રહુ છું. : દીપક પરમાર Saturday, May 26 2007
મારી રચનાઓ 4:08 pm
ફુલોથી ભરેલા બગિચા વચ્ચે,
બની કાંટા, હમેશાં હસતો રહુ છું.
હરરોજ તોલાતી જીંદગીઓ વચ્ચે,
બની ત્રાજવુ, હમેશાં હસતો રહુ છું.
હિન્દું-મુસલીમની લડાઈ વચ્ચે,
બની નાસ્તિક, હમેશાં હસતો રહુ છું.
લોહી તરસ્યા લોકોની વચ્ચે,
બની ઝાંઝવા, હમેશાં હસતો રહુ છું.
બહુરૂપી લોકોની ભીડ વચ્ચે,
બની અરીસો, હમેશાં હસતો રહુ છું.
ચોમેર ફેલાયેલા અંધારા વચ્ચે,
બની “દીપ”, હમેશાં હસતો રહુ છું.
(ઝાંઝવા = મ્રુગજળ)
- દીપક પરમાર (”દીપ”)
તારીખઃ 26/5/2007
વ્યાપી ગયા : દીનેશ ગજ્જર Tuesday, May 15 2007
અન્યની રચનાઓ 2:07 pm
આંખોએ ઈચ્છ્યું કંઈક કહેવું અને ઈશારાઓ ક્ષણ બની વ્યાપી ગયા
ન પહોંચી શક્યા જે મંઝીલે તે સઘળા રણ બની વ્યાપી ગયા
એક પળ જો રહ્યો ગાફેલ તમારા સ્મરણ કરવા માત્રથી
તૂટી પડી ફરિયાદો અને તમારી યાદોના કણ ઘણ બની વ્યાપી ગયા
મનનો માહોલ ફિક્કો હતો જ્યારે તમારી ઉપસ્થિતિ નહતી.
આવ્યા તમે તો સર્વત્ર સુગંધના સ્ત્રોત વળગણ બની વ્યાપી ગયા
સર્જન થયું સૃષ્ટિનું અનંત યુગો બંધાયા એકબીજાથી
તમે બન્યા પ્રેમકથા અમે અવતરણ બની વ્યાપી ગયા.
- દીનેશ ગજ્જર
…ત્યારે કહેજો : દીનેશ ગજ્જર Tuesday, May 15 2007
અન્યની રચનાઓ 2:06 pm
વાદળા સાથે મોકલ્યો છે સંદેશો, મળી જાય ત્યારે કહેજો
ચમકતી વિજળી જ્યારે મન તમારું કળી જાય ત્યારે કહેજો.
આ ચાંદ-તારા જોઈ રહ્યાં છે રાહ આપણા મિલનની
બસ આ નઠારો સૂરજ ઢળી જા ય ત્યારે કહેજો
પાંપણ પર પડ્યો છે પથરાયેલો સપનાનો કાફલો
રખેને તણાઈ જાય એ બધું, આંખ ઝળહળી જાય ત્યારે કહેજો
વસંતનું વાવેતર મેં કરી દીધું તમારા દીલમાં, મંઝીલમાં
બસ ઉદાસીની પાનખર એના દેશ વળી જાય ત્યારે કહેજો
એવી સંવેદિતા છે આપણી વચ્ચે કે આંખ મારી પલકારા તમારા
મારું આકાશ વરસે અને ત્યાં પ્રેમ પલળી જાય ત્યારે કહેજો
હું ચાહીશ તમને મન મૂકીને અનંત યુગોના અંત સુધી
તમે પણ કોઈ અદમ્ય ઝંખના મનમાં સળવળી જાય ત્યારે કહેજો
-દીનેશ ગજ્જર
એક ક્ષણ માટે Monday, May 14 2007
મારી રચનાઓ and મુક્તકો 7:18 am
ઈચ્છા એ કે હું મળું, એક ક્ષણ માટે,
ના ભુલે કોઈ મને, એક ક્ષણ માટે,
તરસ વરસોની,સાગર પણ ઓછો પડશે,
મ્રુગજળ તો મળે મને, એક ક્ષણ માટે.
-દીપક પરમાર (”દીપ”)
તારીખઃ 13/5/2007
માણવા લાયક મુક્તકો Wednesday, May 2 2007
મુક્તકો 6:19 am
કોણ ભલાને પૂછે છે ? અહીં કોણ બૂરાને પૂછે છે ?
મતલબથી બધાને નિસ્બત છે, અહીં કોણ ખરાને પૂછે છે ?
અત્તરને નીચોવી કોણ પછી ફૂલોની દશાને પૂછે છે ?
સંજોગ ઝુકાવે છે નહીંતર અહીં કોણ ખુદાને પૂછે છે ?
- કૈલાસ પંડિત
આ મહોબ્બત છે કે છે એની દયા કહેતા નથી
એક મુદ્દત થઈ કે તેઓ હા કે ના કહેતા નથી
બે જણા દિલથી મળે તો એક મજલીસ છે ‘મરીઝ’
દિલ વિના લાખો મળે એને સભા કહેતા નથી !
-’મરીઝ’
દમકતો ને ચમકતો શાહજહાંનો મહેલ જોવા દે
મને ધનવાન મજનૂએ કરેલો ખેલ જોવા દે
પ્રદર્શન કાજ ચાહત કેદ છે જેમાં જમાનાથી
મને એ ખૂબસૂરત પથ્થરોની જેલ જોવા દે
-શેખાદમ આબુવાલા
જો સ્વાર્થભરી દુનિયાની નજર, ને મારા વિચારો સમજી જા
મઝધારમાં રહેતાં શીખી જા, ને શું છે કિનારો સમજી જા
કંઇ લાખ કથાઓ કહેતી ફરે છે મારા નયનની ચુપકીદી
એકાંતે રડેલી આંખોના આ છાના ઇશારા સમજી જા
-સૈફ પાલનપૂરી
હા! હું પતંગ છું. - દીપક પરમાર Monday, Apr 30 2007
કવીતા and મારી રચનાઓ 5:49 am
રંગબેરંગી ઉંચા આકાશમાં,
આમ-તેમ ઝોલા ખાતો,
હા! હું પતંગ છું.
એક હાથથી બીજા હાથમાં,
શુક્ક્લના નામે પીંખવાતો,
હા! હું પતંગ છું.
બીજાના પેંચની રમતમાં,
આખરે હુંજ કપાતો,
હા! હું પતંગ છું.
રોડમાં,મેદાનમાં,ધાબામાં,
બસ! હુંજ લુંટાતો,
હા! હું પતંગ છું.
જીવનના છેલ્લા દીવસોમાં,
કોઈ ઝાડ કે તારમાં અટવાતો,
હા! હું પતંગ છું.
ના મન હોય મારું ઉડવામાં,
કુંચો કરી ખુણામાં ફેકાતો,
હા! હું પતંગ છું.
“દીપ”ને આ જગતમાં,
બસ! હુંજ સમદુઃખી લાગતો,
હા! હું પતંગ છું.
-દીપક પરમાર (”દીપ”)
તારીખઃ29/4/2007
તો ચાલશે? - દીપક પરમાર Wednesday, Apr 25 2007
કવીતા and મારી રચનાઓ 8:34 am
આ દોડધામમાં, આ ધક્કામુક્કીમાં,
એકાદ ક્ષણ થાક ખાઈને,
જો હું તને યાદ કરી લઉં, તો ચાલશે?
આ રાડારાડમાં, આ બુમબરાડામાં,
એકાદ મધુર પંક્તી ગાઈને,
જો હું તને યાદ કરી લઉં, તો ચાલશે?
આ સંજોગો સાથેના તાલમેલમાં,
એકાદ તાલે ઝુમીને,
જો હું તને યાદ કરી લઉં,તો ચાલશે?
આ ફૂલો સમી કોમળ યાદોમાં,
એકાદ પાંખડી તોડીને,
જો હું તને યાદ કરી લઉં, તો ચાલશે?
આ ભરઉંઘના સપનાઓમાં,
એકાદ પડખું ફરીને,
જો હું તને યાદ કરી લઉં, તો ચાલશે?
આ હરદમ ધબકતા દીલમાં,
એકાદ ધબકારો ચુકીને,
જો હું તને યાદ કરી લઉં, તો ચાલશે?
આ જીવનના અસીમ અંધારામાં,
એકાદ “દીપ” પ્રગટાવીને,
જો હું તને યાદ કરી લઉં, તો ચાલશે?
-દીપક પરમાર (”દીપ”)
તારીખઃ24/4/2007
